मुंबई : 'येशू ख्रिस्त हे तामिळ हिंदू होते आणि त्यांचे खरे नाव केशव कृष्ण होते. मुळात ख्रिस्ती धर्म हा अस्तित्वातच नव्हता, तो हिंदू धर्मातील एक पंथ होता, येशू भारतात आल्यानंतर त्यांनी योगाचे प्रशिक्षण घेतले..', असे नानाविध दावे करणाऱ्या 'ख्रिस्त परिचय अर्थात ख्रिस्ताचे हिंदुत्व' या वादग्रस्त पुस्तकाचा वाद आता मुंबई उच्च न्यायालयात पोचला आहे. स्वातंत्र्यवीर सावरकर यांचे बंधू बाबाराव सावरकर यांनी लिहिलेल्या या मराठी पुस्तकाविरोधात 'ऑल इंडिया ट्रू ख्रिश्चन कौन्सिल ट्रस्ट' या संस्थेने उच्च न्यायालयात धाव घेतली आहे. 'हे वादग्रस्त पुस्तक दोन धर्मांत व समाजांत तेढ निर्माण करणारे आहे. ख्रिस्ती धर्मातील लोकांच्या धार्मिक भावनांना ठेच पोचवणारे आहे. तसेच देशातील सौहार्दाचे वातावरण बिघडवणारे आहे. भारतीय दंड संहितेच्या १५३(अ), २९२, २९३, २९५(अ) या कलमांचा भंग करणारे आहे. त्यामुळे फौजदारी दंड संहितेच्या कलम ९५खालील अधिसूचनेद्वारे त्याची प्रत्येक प्रत जप्त करण्याची कारवाई करण्याचे आदेश राज्य सरकारला द्यावेत. याविषयी कोर्ट रिसिव्हरची नेमणूक करावी आणि पुस्तकाच्या प्रकाशन-वितरणाला मज्जाव करावा', अशी विनंती संस्थेने अॅड. पंकज पुर्वे यांच्यामार्फत केलेल्या या फौजदारी जनहित याचिकेत केली आहे. या पुस्तकाचे २६ फेब्रुवारी २०१६ रोजी पुनःप्रकाशन होत असल्याचे कळताच राज्य सरकार आणि स्थानिक प्रशासनांना विनंती करूनही कारवाई झाली नाही. म्हणून याचिका करावी लागली असल्याचा दावाही संस्थेने केला आहे. याविषयी न्या. व्ही. एम. कानडे व न्या. एम. एस. सोनक यांच्या खंडपीठापुढे नुकतीच प्राथमिक सुनावणी झाली. त्यावेळी राज्यघटनेने अनुच्छेद १९मध्ये दिलेल्या भाषा स्वातंत्र्याच्या मूलभूत हक्कातील तरतुदींचा या पुस्तकामुळे भंग कसा होत आहे आणि त्याविषयीचे न्यायनिवाडे काय आहेत, याची तपशीलवार माहिती अभ्यास करून आमच्यासमोर ठेवा, असे याचिकादारांच्या वकिलांना सुचवून खंडपीठाने दोन आठवड्यांनी पुढची सुनावणी ठेवली.
पोलिस आयुक्तही प्रतिवादी या याचिकेत संस्थेने सरकारबरोबरच मुंबई पोलिस आयुक्त, शिवाजी पार्क पोलिस ठाण्याचे वरिष्ठ पोलिस निरीक्षक, स्वातंत्र्यवीर सावरकर राष्ट्रीय स्मारक व पुस्तकाचे संपादक-प्रकाशक आणि मुखपृष्ठाच्या चित्रकारांनाही प्रतिवादी केले आहे.
